ولهذا الأسباب ثرت و سأثور
كل حاجة هاقولها تحت كنت باقولها لمسئولين و صحابى و لناس كثير قبل الثورة و باسألهم ليه مابيحصلش… وكل الناس كانت بتقولى سبب واحد “مافيش ارادة سياسية” فلما لقيت فيه ثورة قلت اهى جت الفرصة اننا نعزل شلة المنتفعين و ندي فرصة للشعب يعيش.. اليكم احلامى و اللى متأكدة انها كانت احلام ناس كتير نزلوا و ساندوا.
1- عشان العشوائيات تتفكك وتنظف و تحصل هجرة عكسية ويعيشوا معززين مكرمين فى بيوت جميلة وتوفير فرص عمل في المحافظات الاقل كثافة و عيشة كريمة!
2- عشان المستشفيات تنظف و الملايات مايبقاش عليها دم و الارض و الحمامات تنضف و الممرضات تدرب والدكاترة يتعلموا و اجورهم تبقى أدمية عشان نقدر نحاسبهم!
3- عشان كان نفسى اشوف شوارع و مواصلات مصر زى اللى برة – نضيفة، أدمية، محترمة بيركبها البيه والبواب وكل ملتزم بالقواعد وتطبق عليه القواعد
4- عشان كان نفسى التعليم بتاعنا يتفور ونطبق احدث الاساليب ومدرسينا ظروفهم تتحسن وياخدوا تدريب عالي و يخترعوا و يبدعوا فى اساليب التدريس و طلابنا طبعا هايطلعوا عباقرة
5- كان نفسي نتحول من مستهلكين من اول اللبان والكبريت لحد تجهيزات البناء لمنتجين ومصنعين ومخترعين ومصدرين
6 – كان نفسي البوليس بتاعنا يبقى شكله محترم و اداءه محترم وعادل وكل واحد ليه حق يعرف ياخده من غير واسطة، كان نفسى اقسام الشرطة كانت تبقى شيك وأدمية ومحترمة والشرطي نضيف وشيك ومهذب وجاد ورياضي و شكله ليه هيبة ودايما مبتسم لان تكشيرته لا هتودي ولا هاتأخر عشان فيه قانون
7- كان نفسي ولا واحد فى الشرطة يكون لابس مدني زى مابنشوف – و كل واحد طالع مع الشرطة ليه زي واسمه مكتوب هو ورتبته فى مكان واضح
8- نفسي كنت ماشوفش الشرطة فى الشوارع بس حاسة بوجودها زى برة
9- كان نفسي الأسعار تنزل و كل الناس تقدر تعيش عيشة كريمة
10 – كان نفسي السياحة الداخلية تزيد و المصريين يستمتعوا بأرضهم – مش واحد يعيش و يموت مارحش اسكندرية
11- كان نفسي الكل يتمتع بتأمين صحي من الكبير للصغير
12- كان نفسي ماشوفش راجل عجوز بيجري ورا الأتوبيس و يتشعبط
13- كان نفسي اشوف الميكروباصات شيك فى شكلها وسلوكها
14- كان نفسي ماسمعش ان فيه قرية او نجع او مركز مش واصله ماية و لا نور و لا غاز
15- كان نفسي ماقولش نفسي اشوف فيكي يا مصر……… و اقول احلى حاجة فيكي مصر….
و من الواضح ان ولا حاجة من اللى فوق اتحققت ولا هى على اجندتهم اصلا….. ثورة ثورة حتى القول “احلى حاجة فيكى يا مصر…...
ملحوظة: حد بيعد المليارات اللى بيدخلها مرسى؟ المانشيتات اللى مغرقة الصحف! عدوا عشان نعرف نحاسبه! عشان الحساب هايتقل!
نهال صلاح
كتبت بتاريخ 17 سبتمبر 2012
الصفحة الرسمية لـ “نهال صلاح” على الفيس بوك
NehalSalah 
والله انا كلامي من كلامك ومعاكي في كل اللي انتي قولتيه
نفسي بقي الكلام دا يتحقق
عشان يجي اليوم اللي نقرأ فيع المقال دا تاني ونشي كلمه(كان نفسي) عشان يبقي حقيقة عايشين فيها