حالى من اول ما وعيت للدنيا لحد 22 يناير 2010:
مواطنة مصرية، بركن صف تانى و العن ان مفيش نظام نمشى كلنا عليه لكن هاعمل ايه؟
مدخلش قسم اقضى اى مصلحة الا معايا وسطة و اشتم فى النظام الفاسد اللى حوجنى لكن هاعمل ايه؟
اشوف مستشفيات حكومية و اسمع قصص تدلل على فساد و فشل الدولة و الدكاترة و الممرضين و المديرين – نتبرع و نشتم و نحسبن بس اكثر من كده هعمل ايه؟
كل شغلى كان مع شباب و كنت فى كل محطة بحاول اغير حاجات كثير من اللى فوق مع الاعتراف انى جزء منها و هما يقولوا ماهى الدولة بنت اللى ……….هنعمل ايه
عملت مبادرات اجتماعية( ضد التحرش و التفكير الابداعى فى حل مشاكل الوطن) لما كنت مسئولة عن مجلات شبابية و حققنا تاثير كبير و نجاحات و اتشدينا انا وصاحبة المجلة فى امن الدولة عشان الكبار مكنوش راضيين عن حجم التاثير لينا فى الشباب وحجم وصول تلك الحملات للأقاليم و لعناصر فاعلة من الشباب
وقفت وقفات مشرفة محدودة امام النظام و امن الدولة و من يمثلوهم و يمثلوا السياسات القمعية فى مختلف المواقع و يشهد عليا ناس كتير
عجبتنى و شيرت صورة و قفة خالد سعيد لما لقيت صورة متداولة لشباب واقف لابس اسود و باصص للبحر و قلت الله انا ممكن اشارك فى البتاع ده – سلمى و مش عنيف و بيوصل رسالة مهمة
اشتركت فى الاضراب و لبس الاسود بتاع 6 ابريل – عجبتنى الفكرة – اه عايزين نوصل لحكومة اننا مش مبسوطين
يوم 23 يناير اتفرجت على فيديو عمرو عفيفى – كان منتشر قوى بس مكنتش بافتحه – و لقيت كلام منطقى جدا ان ازاى لو نزلنا عدد كبير و التزمنا بالسلمية وطبطبنا على عسكرى الامن اللى غلبان و مقهور زينا الشرطة هتنهار بعد 3 ايام ( الانهيار عندى كان يعنى انهم مش هيعذبوا و هيفهموا الرسالة لانهم مش هيقدروا يقبضوا على عدد كبير)
فادورت على الشباب و سمعتهم كلام سخيف عن ضرورة النزول ووقت :اعمل ايه خلص – لان اهه جت الفرصة نعمل و نعمل حاجة صح – الكلام كان سخيف و مستفز وبعد اما كانوا مش نازلين قررنا كلنا ننزل
و يومها اتقبض على كل الولاد اللى كانوا معانا
و نزلت جمعة الغضب و امى اضطرت تنزل معايا عشان الموبايلات كانت مقطوعة و يومها مشينا من طريق النصر لرمسيس فى احلى مسيرة فى الدنيا
المهم فضلت اسمع لعمرو عفيفى و لغيره و اوافق على فيديدوهات و ارفض فيديوهات – مش اللى متفق مع جهلى السياسى – انا كنت باخد اللى بيبقى فيه منطق)
المهم خدت المشوار كله – جمعات و مسيرات و مسيرات – و جرى ورا اللى ااتحبسوا – و جمعات و ثلاثات و ايفنتات و اشتراكيين و اجتماعات و ماسبيرو و استفتاء ،محمد محمود و انتخابات و مجلس وزراء – اخوان و مظاهرات تانى – و مسيرات و مهاترات و و اجتماعات و عسكر كاذبون و يسقط حكم العسكر و انتخابات و مظاهرات و مسيرات و هتفافات و دستور لا و – انتخابات و دستور تانى لا تالث
والحشد ل 30 يونيو – و 30 يونيو و يوليو و لحد لولوللولولى البيان و لوولللوولولولى التانية فض رابعة و النهضة
مواقفى باختصار
1- ضد فساد الدولة فى عهد مبارك
2- ضد ان دولة بموارد زى مصر يبقى فيها فقير مدقع واحد – ده دليل على فساد عظيم
3- ضد مستوى الخدمات المتدنى و مستوى موظفين الحكومة و نظامها
4- ضد ان الشرطة تبقى سلطة مش خدمة امنية مبنية على اساس وقوانين و تقنيات
5- ضد ان ظباط لجيش ياخدوا مواقع مدنية مكأفأة خدمة
6- ضد ان مفيش حد وطنى الا يكون من الجيش امال ال 30 مليون اللى نزلوا دول ايه – ما فيهم المهندس و المدير و الخبير و الاستشارى وطنيين
7- ضد طريقة شغل الاحزاب الجديدة و القديمة ( لانى قربت منهم 70كلهم % منهم زبالة)
8- ضد التطبيل للشباب على الصح و على الغلط و انهم اللى فاهمين و شايفين و انهم اللى عندهم حق – لا هما كده و لا الكبار هما اللى معاهم الخبرة و الحكمة و الفكر- فيه متخلفين فى الفريقين و خونة و فى الفريقين و هطل فى الفريقين و جهلة فى الفريقين
9- ضد منظومة الفاسدين اللى مسكين حقوق الانسان عندنا لكن ضد اكثر مماراسات دولة سافلة مدية الخونة فرصة و مبرر لدعمهم
10- ضد الاخوان على طووووووووووووول الخط
11- ضد حاجااااات كتير بس دى تغطى النقط الاساسىة
انا قررت عن اقتناع تام و كامل انتخاب السيسى – الرئيس السيسى مش المشير
ومن هنا كلامى موجه للمشير السيسى:
سيادة المشير:
1- انت بطل ووطنى و محترم و صادق و انا اشعر انك امين
2- انا كعادتى لن انسى الجميل ولن اتنكر له
3- لا اراك سفاحا على الاطلاق بل حكيم فى فضك لرابعة انت و الامن والشرطة فقد كان على الهواء مباشرة و دعوتم جميع الحقوقيين للتواجد و تابعته و انا فى امريكا لحظة بلحظة على 3 قنوات
و تابعت شهادات ساكنى رابعة العدوية – شهادات مختلفة – متفرقة كلها تثيبت اجرام الاخوان و بدأهم بالعنف – لن انسى مشاهد قتل الاخوان لبعضهم اللى الناس شافوها بيعنهم و نسيوها و للن انسى شرح الخرباوى لكيفية تنظيمهم و ترتيبهم لقتل من معهم دون من هم فى التنظيم عشان ميخسروش اخ بس يضحوا بمحب – عشان محتاجين جثث و صور و اعلام.بس الناس بتنسى ازاى و بتردد زى البغبغانات (مذبحة – افراط) مش عارفة.
4- انا مصدقاك يوم ما قلت ان اشرفلك انك تحافظ على ارادة المصريين عن انك تحكمهم و وصدقتك لما كنت بتقول مش هتحكم مصر و لما الفريق بتاع السويس قال لو المشير بقى رئيس يبقى انقلاب فريحوا نفيسسكم محدش عيزها – برضه كان صادق
5- فاكرة و مش ناسية ان كتير من اللى نزلوا فى 30 /6 طالبوك بالنزول و التقدم للرئاسة (يمكن ساعتها انا ممكنتش متحمسة انك تحكم بس عايزاك تخلصنا)
6- اللى زاح الاخوان ربنا – اللى حرك الكنب و حرك الجيش فى اتجاه الوطن
7- اللى حرس مصر – ربنا اللى حماها عن مصير سوريا و ليبيا و سبب توحد الشعب و سندة الجيش
8- معجبة بقدرة الجيش على التماسك فى حرب دولية استخدمت غضب حقيقى على الارض عشان تستغله فى الاتجاه اللى عايزاه – حرب صور و فيديوهات و ضر ب تحت الحزام و كله مغلف بطلبات شعبية قصرت البلد فى تحقيقها للشعب
بس يا سيادة االمشير السيسى:
1- تعامل الجيش مع اللى حصل فى ماسيبروا فضيحة و يجب معالجتها مش هننساها و مش هنطرمخ عليها – الجيش لما اعترف انه قتل طفل البطاطا بالخطأ كله كتم و محدش عرف يزايد
انتم مش الهة – اعترفوا بخطأ اتعمل امام اعيننا عدم اعتارفكم بيه لا يمحيه!!!
2- فض الاعتصام باالطريقة الغبية فى ميدان التحرير فى رمضان وقت الفطار وجب الاعتذار عنه و اعلانه انه خطأ
3- الشباب اللى بيدخل الجيش بيخرج بصورة و انطباعات سيئة جداااااا و يلاقيك طالع تقول ده اعظم جيش فى الوجود – شيئ يخليهم يشككوا فى مصداقيتك و انا كمان – خلى بالك
4- كشوف العذرية انت بنفسك بكل شجاعة طلعت قلت – ان ده اجراء اضطرارى لما الجيش يتحفظ علي البنات لكتابة حالة الاستلام عشان محدش يطلع يقول انا تم الاعتدداء عليا و انا اتفهم ده – بس الاسلوب اللى اتعمل فيه كما حكى عنه فى غرف مفتوحة بلا اى احترام لحرمة بنى ادم – مرفوض و مش هننساه و عايزين اعتذاااار اصلى مينفعش تكون بتقول بتحب البنات و بتحترمهم و هما نور عينيك و بعدين دى تعدى عليك “المصداقية”
كلامي القادم لسيادة الرئيس المحتمل –ومن سأعطيه صوتى
1- انا متفهمة جدا انك ممكن تكون اضطررت لهذا المنصب سواء من الناس او من المؤسسة او الظروف المقندلة اللى احنا فيها مفيش اصلا مرشحين عايزين يتقدموا للمنصب
2- انا متفهمة انك جى من اجهزة مش بتاعة كلام بتاعة شغل
3- انا متفهمة جدا انك مش حريف خطابة و جدال سياسى زى منافسك
4- انا متفهمة جدا حجم المؤامرات برة و جوة اللى انت بتواجهاا و عارفهها (معلومات) + الحمل الاقتصادى + الحمل السياسى الخارجى و الداخلى + احلام مشروعة مؤجلة لشعب من سنين + فسدة نظام+ فسدة جدد+ ثوار احرار مش فاكرين هما ليه ثايرين + نشاطاء و حكوكيين الله اعلم بما فى نفوسهم و جيوبهم
5- متفهمة اننا كشعب غلب علينا الفساد و الانتخة و قلة الادب و البلطجة ( و كله بسبب الدولة الفاسدة – اللى جعلت قانون الغابة هو الى ماشى )
6- متفهمة ليه مطلعتش ببرنامج انتخابى بس مش راضية عن ده عقلى قاللى انه امبارح كان وزير دفاع و اول مدير مخابرات و مقتنعة ان نيته مكنتش النط على الحكم “قدرت” “تفهمت” “استوعبت” و لما لقيتم بتقول لرؤساء الصحف اى مسئول ييجى اجوله فرصة بس يرتب اوراقه حسيت بامانتك
ولكن سيادة الرئيس:
لن اقبل الا بتغيير كلى و جذرى فى فلسفة الدولة- المواطن:
1- انا لن اقبل دولة لا تحترم المواطن احترام كااااااااامل (من اول مسكنه و المية اللى بتوصل له و المجارى و مرورا بالشارع اللى بيركن او بيمشى فيه و المواصلات اللى بيركبها – موقف الاوتوبيس او الميكبروباص
2- انا لن اقبل اى “معالى” اللى عايز يتقاله “معالى” يسمى نفسه “معالى” كلكم موظفين محترمين لكم من الحقوق ما للمواطن منا
3- حاسب من البطانة لان مش هوجدلك اعذار عينك عليهم … عينك عليهم !!!
4- انا مش هقبل بفساد الشرطة و لا امن الدولة – بس هبقى مفتحة ان فيه حاجات هتتلفق و هستناك توضح اول بأول عشان البيئة هتبقى خصبة للفبركة و التصديق
5- مش هقبل ان المحافظات ( لسة صديق احترمه كثير قايللى امبارح) نفس المشاكل فى المرور و السكن والطوابير على العيش و الهرجلة اللى فى العاصمة هى هى اللى موجوده فى محافظات صغيرة يعنى ده تخلف ممنهج ملوش علاقة بالعددد بقى
6- العدالة و الشفافية و العمل و التواصل طريقك الوحيد
7- كبر دماغك من الشتايم و التريقة و النكت – استفيد منها و حسن الاداء و زود الانجاز هو ده اللى هيفضل
8- اى مؤسسة – اى موظف مهما كبر و لا على خادم للمواطن
9- يا ريت تفكر نفسك انكم مفوضين انكم تيدروا مواردنااااا لمصلحتناااا و لخدمتنااااااا
ربنا معاك يا كبير
و ربنا مع الشعب اللى استحمل كتير و كترت حواليه السكاكين تستغل صبره اللى نفذ و تستغل تعبه و تستغل تجاهل الدولة ليه
يا رب انت وراء كل قصد و قصدى من تلك الكلمات فاعنه ان يفقه قولى و ووفقه ووفقنا معه الى ما تحب و ترضى
ونقول يا رب بصر و اهدى ووفق
– نهال صلاح
كتبت يوم السبت الموافق 17 مايو
https://www.facebook.com/NehSalah
NehalSalah 