نهال صلاح تكتب: رسالة إلى “الوالى” …”علل لما سبق”؟

 هو صحيح الشكوى لغير الله مذلة و لكن انا فى رسالتي دي باخد بالأسباب و هابعت رسالة “للوالى” و اقول له انا خايفة ومحبطة وقلقانة ومخنوقة زي ناس كثير شباب وكبار وعواجيز، زي أهل سينا والنوبة والفلاحين  الصعايدة.

هتخيل انه اهتم وسألنى و القلق يعتري جبهته:

“ليه يا بنتى؟”

اقولك يا سيدي بس مافيناش من طوارئ.. و ده رأي انا .. مالوش علاقة بالمكان اللى بشتغل فيه عشان بس نبقى على مية بيضة.

عايز تعرف القلق جي منين؟ طيب خد عندك:

1-  لأن الناس على اختلاف مواقفها واتجهاتها كانت مع الجيش قلبا وقالبا ماحدش كان ضده او مختلف معاه خالص فى اول فترة الثورة!!

بس كلما مرت الأحداث و تعاقبت  التصريحات وانتفخت  بلالين الإختبار -و فرقعت-  و توالت الإنكارات ورفعت !!الأصابع وعلت الحناجر وغلظت اللغة .. كل ما ده إتغير!

2- فى  ناس كانت حاسة ان الجيش لما يمسك الفترة الانتقالية، و ننزل نقول “نعم” فى الاستفتاء، الحياة هاتبقى فل لإن كله بيحب الجيش والجيش هيجيب حقنا وهيظبط الفترة الصعبة دي وهيسلمنا فى ست شهور لحكومة وبرلمان ورئيس. ! وده حصل؟ … ماحصلش لسة- على رأي شريهان- طب هيحصل إمتى وإزاى و اتك عاى ازاى دى .. نو بودي نوز- اى لا احد يعرف.

3- كنت بتقولنا انك منحاز للثورة و الثوار والمطالب المشروعة  دلوقتى الإحساس ده قل جدا و حل مكانه القلق والتربص!؟؟؟؟

4-  وعدت بمحاربة ومحاكمة المفسدين و شايفينك بتدافع عن حقهم فى القاء فى اماكنهم و سايبهم فى كل مكان؟؟؟

5- !!قلت ان أولاد ثورتنا ابطال وبعدين  قلت ان فيهم خونة وماقدمتلناش الدليل؟؟؟؟

6- خلتنا شهور نضيعها فى حاجات ادتهلنا فى الاخر لإنك عارف انه اقل ما يطلب بعد  الثورة- زي تغيير المحافظين و قيادات ماسبيرو و حل المجالس المحلية و تغيير رؤساء التحرير و محاكمات علنية…الخ؟؟؟؟؟

7-!!! كل ما تنفذلنا طلب ونفرح و نجدد ثقتنا تانى نلاقي البديل اللي انت طرحته او وافقت عليه يا اما وثيق الصلة بالنظام .. يا اما من اتباعه و له تاريخ فى فساد او مقبول و لكن مكتف اليدين؟؟؟؟

8- لما جه اردوجان و معاه 200 رجل اعمال فاتحين دراعهم و اقتصادهم لينا، خرجتهم باستثمارات هزيلة بخمسة مليار فقط؟؟؟؟!!!! ليه؟

9- سايبين البلطجية فى كل حتة  وعمالين تفرضوا عقوبات و تخططوا ازاى نخمد الثورة – اللى لن تخمد ابدا إلا بإرساء الحقوق وتنفيذ المطالب- و انا متاكدة ان انتم عارفين ده- ليه؟؟؟؟؟؟؟

طب ما كل التخطيط ده -(عشان نطلع روح الثورة والثوار و نشوههم بقى عشان كده دورهم خلص وعايزين نظبط الشغل بقى على كيفنا!!-)  لو إستغلناه صح كنا وجهناه في مثلا: ازاى نلم شمل القوى السياسية المقهورة بقالها 60 سنة و اللى كده كده هاتحكم البلد؟؟ او  ازاى نشحذ همم الشباب و وقوتهم للبناء؟؟؟ و ازاى استغل حب الناس لية (جيشهم) – اللى كان فى ذروته فى اول الثورة – و اعمل ميثاق شرف لسلوك المصري و ميثاق شرف للاعلام و ميثاق شرف للأعمال؟؟؟؟؟!!!!! ده انتم كنتم ممكن تبنوا مصر فى كام شهر !!!و ترجعوا ثكناتكم على اكتاف الشعب المصري و على رؤسهم كمان.

انت عارف لو فعلا حسينا ان احنا رايحين فى الاتجاه المظبوط و الله كنا هانسوى الهوايل، كنا هانشتغل 90 ساعة فى اليوم، كنا هانلغى اجازاتنا، كنا هانتبرع بأجورنا، و مصر دى كانت هتبقى النسر الإفريقى فى الإقتصاد في وقت قياسي، مش ده كان يفرحك برضه ان احفادك يعيشوا فى بلد فيها عدل وامان وعمل وضمير واحترام!

و النبي مش ده كان يبقى احسن بدل اللي احنا فيه ده! مشاعرنا ناحيتكم ملخبطة ومحبطة، اللى متضايق واللى شاكك واللى حاسس بالظلم واللى حاسس بالخديعة واللى حاسس بإن الثورة الحقيقية جاية.

هو العمر فيه قد ايه عشان نقضيه ثلاث ارباعه فى ظلم وفقر وقرف وسرقة وهم وذل و كمان مستكترين علينا ربع مظبوط؟ او حتى عالريحة؟؟؟؟؟!!!

علل يا سيادة “الوالى” علل لما سبق؟؟؟